اكلات عيد الاضحى,فتة اللحم بالزبادى والمكسرات

فتة اللحمة بالزبادي والمكسّرات
المقادير:
2 كوب أرز
كيلو لحمة ضاني مقطّعة مكعبات
عيش شامي محمّص
ملعقة صغيرة قرفة
بصلة كبيرة مقطّعة
2 ملعقة كبيرة سمن
2 فص حبهان
ورقة لاورا
ملح وفلفل
قرنفل
صنوبر ولوز محمّص للتزيين

مقادير صلصة الزبادي:
5 علبة زبادي
ملعقة كبيرة طحينة
ملعقة كبيرة عصير ليمون
فص ثوم
ملح وفلفل

الطريقة:
1- اسلقي اللحمة في كمية مناسبة من الميه، وضيفي معاها البصل والحبهان والقرنفل والقرفة وورق اللاورا، وما تنسيش تتبّلي الشوربة بالملح والفلفل.

2- حطّي السمنة في إناء آخر على نار متوسّطة، وحمّري الأرز لمدة 3 دقائق أو لغاية ما يتشرّب تماما بالسمنة، وبعد كده ضيفي كوبين ونصف ميه، وممكن تخلطي الميه مع الشوربة وتبّليه بشوية ملح، وسيبيه على النار لغاية ما يبدأ في الغليان، وبعد كده قلّلي النار، وغطّي الإناء وسيبيه لمدة 20 دقيقة أو لغاية ما تتأكّدي إنه استوى تماما.

3- حضّري صلصة الزبادي بإنك تخلطي كل مكوّناتها مع بعضها.

4- هاتي صينية فايريكس وحطّي فيها طبقة من العيش المحمّص، وحطّي عليه كمية مناسبة من شوربة اللحمة، بس خلّي بالك إنك ما تزوّديش كمية الشوربة أوي علشان العيش ما يعجّنش منك، وبعد كده حطّي طبقة من الأرز وعلى الوش حطّي قطع اللحمة، وفي الآخر خالص وزّعي صلصة الزبادي، وزيّني الصينية بالصنوبر المحمّص.. وبالهنا والشفا.